තල කිරි ටොෆී

නිකන්ම කිරි ටොෆී හදනවට වඩා තල ටිකක් එහෙම දාලා හදා ගන්න කිරි ටොෆී එකත් හරිම රසයි.

අවශ්‍ය ද්‍රව්‍ය:

ටින් කිරි - 390g
වතුර - ටින් කිරි ටින් එකෙන් 1/2
සීනි - 450g
තල ඇට - 30g
වැනිලා - තේ හැඳි 1 1/2
මාගරින් - 15g
කරදමුංගු කුඩු - තේ හැඳි 01

සාදන ක්‍රමය:

ටින් කිරි ටික පෑන් එකකට දා ගන්න.
ටින් කිරි ටින් එකට වතුර ටිකක් දාලා හොඳට කලවම් කරලා ඒකත් මේ පෑන් එකට දාගන්න.
සීනි ටික ටින් කිරි ටිකත් එක්ක කලවම් කරන්න.
ටින් කිරි ටික උකු වෙනකන් මද ගින්දරේ කලවම් කර ගන්න. මේක ලිපෙන් අයින් කරනකන් දිගටම හැඳි ගාන්න. නැත්නම් එහෙම අඩිය අල්ලනවා.
කිරි ටික ටිකක් ඝන වේගෙන එනකොට තල ඇට ටික දාගන්න.
වැනිලා හා කරදමුංගු කුඩු ටික එකතු කර ගන්න.
මිශ්‍රණය හොඳට උණු වෙලා ඝනට බුබුළු දානකොට බටර් ටික දාගන්න.
මිශ්‍රණය හොඳට හැන්දට බර ගතිය දනෙනකන් උණු කරන්න. ඕනෑවට වඩා උණු කරන්න එපා. එහෙම උනොත් කිරි ටොෆී ටික ගල් වෙලා යයි.
මිශ්‍රණය පදමට ඇවිත් පෑන් එක වටේ වැඩිය ඇලෙන්නේ නැති මට්ටමට ආවහම ඉක්මනින් ලිපෙන් අයින් කරලා බටර් ගා ගත්ත තැටියකට දා ගන්න.
මිශ්‍රණය ඉක්මනින් පැතලි කරලා ඝන වෙන්න කලින් කෑලි වලට කපා ගන්න.
කිරි ටොෆී ටික ටිකක් වෙලා නිමෙන්න තියලා සුළං වදින්නේ නැති භාජනයකට අසුරා ගන්න.