චොක්ලට් සහ පොල් බ්‍රව්නිස් ලේසියෙන් හදමු

හරිම ලේසි මේ බ්‍රව්නි එක චොක්ලට් අතුරුපස වලට කැමති ඔයාලටමයි.

අවශ්‍ය ද්‍රව්‍ය

බටර් - 170g
චොක්ලට් - 100g
ක්ෂණික කෝපි කුඩු - තේ හැඳි 01
සීනි - 200g
බිත්තර - 03
වැනිලා - තේ හැඳි 01
ලුනු - තේ හැඳි 1/2
කොකෝවා පව්ඩර් - මේස හැඳි 01
පාන් පිටි - 95g
ගාගත්ත පොල් - 250g
ටින් කිරි - 340g
චොක්ලට් - 120g
ටින් කිරි හෝ විපින් ක්‍රීම් - 100g

සාදන ක්‍රමය

චොක්ලට් ටිකයි බටර් ටිකයි එකට දාලා හොඳට දිය කර ගන්න.
ඊළගට ලිප නිවලා කෝපි කුඩු ටිකත් මේකටම දාලා දිය කර ගන්න.
දැන් සීනි ටික එකතු කර ගන්න.
සීනි ටිකත් දිය වෙනකන් කලවම් කරලා මේක නිමෙන්න ටිකක් වෙලා තියලා තියන්න.
බිත්තර එක එක දදා හොඳට කලවම් කරන්න.
වැනිලා ටිකයි ලුනු ටිකයිත් දාගන්න.
කොකෝවා පව්ඩර් ටිකයි පිටි ටිකයි දාලා හොඳට කලවම් කරන්න.
දැන් මේ බැටර් එක බේකින් පෑන් එකකට දාලා 180°C ක උෂ්ණත්වයක විනාඩි 30ක් 35ක් විතර බේක් කර ගන්න.
මේක බේක් වෙන අතරතුරේදී අපිට උඩින් දාන පොල් මිශ්‍රණය හදාගන්න පුළුවන්. ඒකට පොල් වලට ටින් කිරි ටික දාලා හොඳට කලවම් කරන්න.
බ්‍රව්නි එක බේක් වෙලා ඉවර උනාට පස්සේ ටිකක් වෙලා නිමෙන්න තියලා හදාගත්ත පොල් මිශ්‍රණය මේකට උඩින් දාලා හොඳට පැතලි කර ගන්න.
ඊළගට චොක්ලට් ටිකට ටින් කිරි ටික දාලා හොඳට කෑලි හිටින්නේ නැති වෙන්න දිය කර ගන්න.
දැන් මේ චොක්ලට් මිශ්‍රණය බ්‍රව්නි එක උඩින් දාගන්න.
මේ බ්‍රව්නි එක හොඳට සෙට් වෙනකන් පැයක් දෙකක් විතර ශීතකරණයේ තියන්න.