තෙලට මිරිසට අඹ කරියක්

අඹ කියන්නෙ ශ්‍රී ලංකාවේ ඉතාමත් ජනප්‍රිය සහ පහසුවෙන් සොයාගත හැකි පලතුරක්. පළතුරක් විතරක්ම නෙමෙයි අඹ මාලුව ටත් උයලා කනවා. අඹ මාලුව හදාගන්න පුළුවන් ක්‍රම කීපයක්ම තියෙනවා. ඒ අතර ඉන් එක් ක්‍රමයක් අද මම ඔයාලට කියලා දෙනවා.

අවශ්‍ය ද්‍රව්‍ය:

බාගෙට ඉදුණු අඹ ගෙඩි 02 (500 g)
තුනපහ කුඩු තේ හැදි 02
බැදගත් මිරිස් කුඩු තේ හැඳි 01
ලුණු කුඩු මේස හැඳි 01
කහ කුඩු තේ හැදි ½
පොල්තෙල් මේස හැඳි 02
සීනි මේස හැඳි 02
විනාකිරි තේ හැදි 01
ලොකු ලූනු ගෙඩි 01
අමු මිරිස් කරල් 01
සේර කැබැල්ලක්
ඉඟුරු
සුදුලූනු
කරද මුංගු
කරාබු නැටි
රම්පෙ
කරපිංචා
කුරුඳු පොතු
උළුහාල් (10 - 12)

සාදන ආකාරය:

අඹ ඇටය සමඟ කැබලිවලට කපා ගන්න.
කපාගත් අඹ කෑලි සියල්ල හොඳින් සෝදන්න.
තුනපහ , මිරිස් කුඩු , ලුණු , කහ සමග වතුර ස්වල්පයක්ද ගෙන අඹ සමග මිශ්‍ර කරන්න .
කරදමුංගු සහ කරාබුනැටි තලාගන්න.
ඉගුරු සහ සුදු ළූණු ද තලාගන්න.
පිස ගැනීම සඳහා යොදා ගන්නා භාජනයට තෙල් ස්වල්පයක් දමා තෙල් රත්වන විට කරදමුංගු, කරාබුනැටි, ඉඟුරු, සුදු ලූනු එකතු කරන්න.
මෙයට රම්පෙ, කරපිංචා ද එකතු කරන්න.
කුරුඳු පොතු, උළු හාල්, මිරිස් සහ සේර එකතු කරන්න.
සියල්ල හොඳින් මිශ්‍ර කර ගනිමින් එයට ලුණු එකතු කරන්න.
මිනිත්තු 01 පමණ තබා එයට අඹ එකතු කරන්න.
භාජනය වසා මිනිත්තු 15 - 20 මදගින්නේ පිසගන්න. වරින් වර හැඳි ගාන්නට අමතක කරන්න එපා.
අඹ හොඳින් තැම්බුණු පසු සීනි එකතු කරන්න.
විනාකිරි එකතු කරන්න.
තවත් මිනිත්තු 02 - 03 පිසගන්න.
දැන් ඔබට රසට හදපු අඹ මාලුව පිළිගන්වන්න පුළුවන්.