කම්මැලි වෙලාවට හප හප ඉන්න රස කෑමක්

ඔයාලට නිකන් කම්මැලි වෙලාවට හප හප ඉන්න කිසිම කරදරයක් නැතුව ලේසියෙන් හදා ගන්න පුළුවන් රස කෑමක් තමයි මේ බැදපු රට කජු.

අවශ්‍ය ද්‍රව්‍ය:

අමු රට කජු - 250g

පොඩි බිත්තර - 02

රස පදමට ලුනු

ගම්මිරිස් කුඩු - තේ හැඳි 1/2

කහ කුඩු - තේ හැඳි 1/2

කෝර්න් පිටි - මේස හැඳි 03 - 04

බැදීමට තෙල්

මිරිස් කුඩු (අවශ්‍ය නම්)

සාදන ක්‍රමය:

මුලින්ම රට කජු වලට බිත්තර ටික දාලා හොඳට කලවම් කර ගන්න. ඔයාලා බිත්තර රට කජු එකට දාන්න කලින් පොඩ්ඩක් බීට් කරලා අර ගන්න.

දැන් මේ රට කජු ටික පෙනේරෙකට හරි වට්ටියකට හරි දාලා වැඩි බිත්තර ටික බේරෙන්න පොඩ්ඩක් වෙලා තියලා තියන්න.

ඊළගට ආයෙත් මේ රට කජු ටික බෝල් එකකට දාගෙන ඒකට ඔයාලගේ රස පදමට ලුනුයි, කහ කුඩුයි, ගම්මිරිස් කුඩුයි දාලා කලවම් කර ගන්න.

අපි දැන් මේකට කෝර්න් පිටි ටික දාලා කලවම් කර ගන්න ඕනේ. ඔයාලා මේකට එක පාරටම ඔක්කොම කෝර්න් පිටි ටික දා ගන්න එපා. මොකද මේ වෙලාවේ රට කජු ටික බිත්තරත් එක්ක කලවම් වෙලා එකට ඇලිලා තියෙන්නේ. මේකට එක පාර කෝර්න් පිටි ටික දාගත්තාට රට කජු ටික වෙන් කර ගන්න හරි අමාරුයි. ඒක හින්දා රට කජු ටික ටික පොඩි පීරිසියකට දාලා කොර්න් පිටි ටික ටික දදා හොඳට හැම රට කජු ඇටේකම කෝර්න් පිටි තවරා ගන්න.

අන්තිමටම මේ රට කජු ටික ටිකක් රන් වන පාට වෙනකන් ගැඹුරු තෙලේ බැද ගන්න. විනාඩියකට වගේ කිට්ටු වෙන්න රට කජු ටික බැදුනහම ඇති. ගොඩක් වෙලා බැද්දොත් එහෙම රට කජු ටික කර වෙලා තිත්ත රස වෙයි.

බැදලා ඉවර උනාට පස්සේ කන වෙලාවට ඔයාලට මේකේ සැර තව ටිකක් වැඩි කර ගන්න ඕනේ නම් මේකට මිරිස් කුඩු ටිකකුත් කලවම් කර ගන්න පුළුවන්.

රට කජු ඔක්කොම හොඳටම නිමුනාට පස්සේ සුළං වදින්නේ නැති භාජනයක අසුරා ගත්තහම ඔයාලට මේක ටික දවසක් තියා ගෙන කන්න පුළුවන්.