කටට කෙළ උනන කරවල හොදි

කරවල හොදි ගොඩක් ජනප්‍රිය ලංකාවේ කෑමක්. සමහර ගෙවල් වල දවල් කෑමට අනිවාර්යෙන් හැමදාම කරවල හොදි හදනවා. රසට කරවල හොද්දක් හදා ගන්නේ මෙන්න මෙහෙමයි.

අවශ්‍ය ද්‍රව්‍ය:

• කෑලි කරවල - 200g
• මිරිස් කුඩු - තේ හැඳි 1 1/2
• ඉදුණු තක්කාලි - 01
• උකු පොල් කිරි - කෝප්ප 2 1/2
• කහ කුඩු - තේ හැඳි 1/2
• උළු හාල් - තේ හැඳි 1/2
• තුනපහ කුඩු - තේ හැඳි 1 1/2
• අමු මිරිස් - කරල් 02
• ගොරකා - බික් 02
• ලොකු ළුණු - 01
• කරපිංචා
• ලුනු - තේ හැඳි 1/2
• රම්පේ

සාදන ක්‍රමය:

• කරවල කෑලි ටික දෙතුන් පාරක් හෝදලා අරගෙන ඇතිලියකට දාගන්න.
• කපාගත්ත ළුණු, අමු මිරිස්, තක්කාලි එකතු කරන්න.
• කරපිංචා, රම්පෙ, ගොරකා ටික දාගන්න.
• මිරිස් කුඩු, කහ කුඩු, උළු හාල්, තුනපහ කුඩු හා පොල් කිරි ටික දාගන්න.
• ලුනු පොඩ්ඩකුත් දා ගන්න. සමහර කරවල වල ලුනු ගතිය ටිකක් තියන නිසා මෙතැනදී ලුනු පොඩ්ඩක් දාලා මදි නම් පස්සේ තව ලුනු ටිකක් එකතු කර ගන්න.
• දැන් මේක ලිපේ තියලා හැදි ගාන ගමන් පොල් කිරි ටික ඉදෙනකන් ටිකක් වෙලා උයා ගන්න.