කටේ දියවෙන කස්ටඩ් කුකීස්

බිත්තර දාන්නේ නැතුව හදන මේ කුකී එක ඔයාලට හරිම පොඩි වේලාවකදී බිස්කට් වෙනුවට රසට ගෙදරදීම හදා ගන්න පුළුවන්.

අවශ්‍ය ද්‍රව්‍ය: කුකී 30 සඳහා

කාමර උෂ්ණත්වයේ බටර් - 250g

අයිසින් සීනි - 155g

පාන් පිටි - 250g

කස්ටඩ් පවුඩර් - 155g

උකු කිරි - මේස හැඳි 03

වැනිලා - තේ හැඳි 01

සාදන ක්‍රමය:

මුලින්ම බටර් ටිකයි සීනි ටිකයි එකට දාලා හොඳට ක්‍රීම් ගතියට එනකන් කලවම් කර ගන්න.

දැන් මේකට උකු කිරි ටිකයි වැනිලා ටිකයි දා ගන්න. උකු කිරි වෙනුවට ඔයාලට බිත්තරයක් ගන්නත් පුළුවන්.

ඊළගට වෙනමම බෝල් එකක පිටියි, කස්ටඩ් පවුඩර් ටිකයි එකට දාලා කලවම් කරලා මේ පිටි මිශ්‍රණය ටිකෙන් ටික බටර් මිශ්‍රනයටම දා ගන්න.

දැන් මේක වහලා පැයක් විතර ෆ්‍රිජ් එකේ තියන්න. එතකොට කුකී බෝල ටික ලේසියෙන් ලස්සනට හදා ගන්න පුළුවන්.

දැන් මේ මිශ්‍රණයෙන් පොඩි පොඩි බෝල හදලා ඒ ටික සීනි වල තවරලා බේකින් ට්‍රේ එකක් උඩින් තියා ගන්න.

අන්තිමටම මේ බෝල ටික ගෑරුප්පුවකින් පොඩ්ඩක් උඩින් තද කරන්න. එතකොට බේක් වෙලා ඉවර උනහම කුකී ටික ලස්සනට එනවා.

ඊළගට කුකී ටික විනාඩි 12-15 විතර 180C ට ප්‍රී හීට් කරපු අවන් එකක බේක් කර ගන්න.

බේක් කර ගත්ත කුකීස් ටික ටිකක් වෙලා නිමෙන්න තියලා රස බලන්න.